Kauna-unahang Lambanog Festival: Inuming bayan, handang iangat sa mundo

Christer Jeff Pabillar

August 31, 2025

“Para sa aming mga maglalambanog, napakalaking tulong po sa amin nito,” ani ni Rodolfo Arpia, pangulo ng lokal na samahan ng mga manggagawa sa niyugan ng Pahinga Sur sa Candelaria.

Ito ang isa sa mga nagbigay-diin sa kauna-unahang Philippine Lambanog Festival na ginanap sa Lucena City, Agosto 26-27.

Nagsama-sama ang mga magsasaka, prodyuser, eksperto, at lokal na komunidad upang itaguyod ang lambanog bilang inuming bayan at produktong may potensyal sa pandaigdigang merkado.

Pinagsama ng Philippine Coconut Authority (PCA) Region IV-A, Pinoytender Management Consultancy, at Manuel S. Enverga University Foundation (MSEUF) ang iba’t ibang sektor upang bigyang-pugay ang lambanog, na matagal nang nakaugat sa kultura ng Quezon.

Kasabay ng pagdiriwang, binigyang-diin ang muling pagsigla ng produksyon ng niyog sa Quezon.

Nakikita ng mga lokal na magsasaka ang positibong epekto ng festival sa kanilang komunidad—mula sa pagtaas ng demand ng lambanog hanggang sa pagbibigay ng oportunidad na mas maipakita ang kalidad ng kanilang produkto. Sa ganitong paraan, ang festival ay hindi lamang selebrasyon ng inumin kundi simbolo rin ng pagbangon at pagpapaunlad ng lokal na industriya ng niyog.

Hindi lamang pagtikim at eksibit ang tampok sa festival. Nagdaos din ng mga forum at seminar na nagbigay-linaw sa potensyal ng lambanog bilang isang premium spirit.

Binigyang-diin nina Ritchie Cruz, tagapagtaguyod ng lambanog, at Troy Arquiza, Global Master Blender ng Bacardi, ang kakayahan ng lambanog na makilala sa pandaigdigang merkado.

Para sa kanila, ito ay higit pa sa inumin—isa itong simbolo ng malikhaing pagkakakilanlan ng Pilipino.

Pinakilala rin ang mga tatak gaya ng Batangas Lakan, isang “extra-premium” lambanog na nakatanggap na ng internasyonal na parangal.

Patunay ito na sa pamamagitan ng maingat na pag-distila at makabagong teknolohiya, kayang iangat ang lokal na inumin mula baryo hanggang bar ng mundo.

Para sa mga lokal na magsasaka at prodyuser, higit pa sa kita ang dala ng festival; paalala ito na ang lambanog ay mahalagang bahagi ng kasaysayan at kultura ng Quezon—isang pamana na maaaring makilala sa buong mundo.

Sa bawat tagay ng lambanog, nakaukit ang tapang, tiyaga, at pag-asa ng mga taga-Quezon. Ngayong binibigyan na ito ng pagkakataong makilala sa buong mundo, malinaw ang tanong: handa na ba ang lambanog na yakapin ng bagong henerasyon?

You might want to read…

Dressed to Impress

Dressed to Impress

Whenever important visitors are expected, there seems to be an urgency to make everything look presentable. As the Philippines prepares for the 49th ASEAN Summit, I cannot help but notice how much attention is being given to the country's appearance. I understand...

Umawit Kayo sa Harap ng mga Dinakip

Umawit Kayo sa Harap ng mga Dinakip

Kayong nag-utos ng pagdakip sa Sucat, awitin ninyo ang Lupang Hinirang sa harap ng mga pinadakip ninyo. Sa salitang lupa, tingnan sa mata ang magsasaka. May kanin sa hapag ninyo. May nagtanim niyan. Sa salitang bayan, tingnan ang manggagawa, ang estudyante, ang...

Hands that sustain the Tree of Life

Hands that sustain the Tree of Life

A tree may be called the Tree of Life, but it is the hands of farmers that keep its bounty alive. Months before palm fronds emerge and heavy bunches are ready for harvest, seasons must be endured and years of growth must take root. Behind every harvest are farmers who...