Tila isang masaganang pag-aani ang araw ng pagtatapos sa kolehiyo ni Jhan Derille C. Unlayao mula sa College of Computing and Multimedia Studies, anak ng isang magiting na magsasaka matapos nakapagtapos ito bilang Summa Cum Laude ng Manuel S. Enverga University Foundation sa kursong Bachelor of Science in Information Technology.
Sa kaniyang pananalita sa Cluster 2 ng 77th Baccalaureate Services and Commencement Exercises sa University Gymnasium noong ika-28 ng Hunyo, sinabi ni Unlayao na naging inspirasyon niya ang kanyang ama na isang magsasaka. Dito rin ay binigyang pansin niya ang kahalagahan ng pagsasaka at ang mga napapanahong isyu sa sektor ng agrikultura.
“When I was young, he often said, ‘Anak, mag aral ka nang mabuti para hindi ka magaya sa akin.’ His words and life circumstances have opened my eyes in the harsh reality of farmers faced today,’ ani Unlayao. “Kaya po, huwag nating maliitin ang marangal na trabaho na pagsasaka.”
Samantala, binigyan ng pormal na pagkilala ang mahigit 800 na mga nagsipagtapos sa Cluster 2 sa ikalawang araw ng seremonya.
Nagsipagtapos ang 289 na mga mag-aaral mula sa College of Engineering (CEng), habang mahigit 600 naman ang nagsipagtapos sa Expanded Tertiary Education Equivalency and Accreditation Program (ETEEAP) sa ilalim ng pitong departamento kabilang ang CEng, College of Computing and Multimedia Studies, College of Criminal Justice and Criminology, College of International Hospitality and Tourism Management, College of Education, College of Business and Accountancy at College of Arts and Sciences.
Kasabay ng programa, pinangunahan ni Gello Genisse R. Capistrano na nagtapos naman bilang Cum Laude sa kursong Bachelor of Science in Civil Engineering ang Pledge of Loyalty to the Alma Mater.
Bukod sa seremonya, inani din ng dalawang alumni ang parangal bilang Most Distinguished Alumni of 2024 para sa kanilang natatanging pagganap at dedikasyon sa pag serbisyo sa komunidad. Binigay ang mga naturang parangal kay Dr. Guillermo M. Rago Jr. at Cherry Villamarzo-David.
