Hindi pinalagpas ng mga manlalaro mula sa iba’t ibang departamento ang pagkakataon na ipakita ang kanilang husay sa larangan ng Table Tennis sa isinagawang Intramural Games 2023 sa University Gymnasium, Okt. 26.
Kani-kanilang diskarte ang ipinamalas ng mga kalahok sa kompetisyon na siyang naging daan ng ilan upang maihatid ang inaasam na mga medalya para sa kanilang mga departamento.
Sa Single A ng dibisyon ng mga kalalakihan, pinatikim ni Juan Miguel Sebastian Beloso ng College of Nursing and Allied Health Sciences (CNAHS) Leopards kay Kim Arano ng College of Engineering (CEng) Tigers ang pagkatalo sa kanilang pinal na pagtutuos, 3-1.
Bumawi naman ang pambato ng College of Computing and Multimedia Studies (CCMS) Sabertooth na si Jhoram Bala mula sa kaniyang pagkatalo sa unang set ng laro laban sa College of Maritime Education (CME) Puma na si Calvin Escalada upang iuwi ang gintong medalya sa Men’s Single B, 3-1.
Tila binawi naman ng mga Puma na sina Shannon Alzola at Rusell Evangelista ang pagkatalo ng kanilang kasamahan nang kanilang talunin ang Sabertooth na sina Sherwin Roazon at Nino Elma sa Men’s Doubles, 3-1.
Samantala, kapwa mga pambato mula sa College of Architecture and Fine Arts (CAFA) Panthers at College of Arts and Sciences (CAS) Lynx ang nag-gitgitan para sa kampeonato ng Women’s Single A at Single B.
Tinuldukan ni Aila Tabernilla ng Panthers ang labanan sa Women’s Single A kontra kay Charleu Brusas ng CAS Lynx, 3-0, habang ang Lynx naman na si Cyred Van Axle Sacriz naman ang namayagpag sa Women’s Single B laban kay Dasyree Dungan ng Panthers, 3-0.
Isang ginto pa ang naiuwi ni Sacriz para sa CAS Lynx nang maungusan niya at ng kapareha niyang si Mary Azagra ang duo ng CNAHS Leopards na sina Alliah Avila at Lei Agnes Barrera sa Women’s Doubles, 3-0.
Kasama naman ni Tabernilla ang kapwa Panther na si Niel Dacasin sa pagkamit ng kampeonato sa Mixed Doubles kontra kina Trisha Mae Pineda at Jhoram Bala ng Sabertooth, 3-0.
Sa huli, kapwa nagkamit ang CAFA at CAS ng tig-tatlong gintong medalya sa nasabing patimpalak.
