Lucena City — Mahigit 7% ang itinaas ng bilang ng mga nagsipagtapos ngayong taon sa Manuel S. Enverga University Foundation mula sa 1,742 noong 2023.
Nagmartsa ang 1,870 na mga nagsipagtapos, 984 sa Cluster 1 at 886 naman sa Cluster 2, mula sa 11 pang-akademikong departamento sa ginanap na 77th Baccalaureate Services and Commencement Exercises, Hunyo 25 at 28.
Nanguna ang departamento ng Expanded Tertiary Education Equivalency and Accreditation Program (ETEEAP) sa may pinakamaraming nagsipagtapos na may bilang na 597 kung saan 504 dito ay galing sa College of Engineering (CENG). Sinundan ulit ito ng CENG na may 289 nagsipagtapos ng four-year Bachelor’s Degree at CCJC na may 237.
“As you wear your cap and hood, which symbolize your role as respectable members of our society, I now request you to light your candles, symbolizing the light which the university most willingly showered you during your stay in this institution,” pahayag ng University President Madame Naila Leveriza sa hood, cap, and candle ceremony.
Pitumpu’t anim sa mga nagtapos ang kinilalang may karangalang pang-akademiko. Kabilang dito ang 61 cum laude, 13 magna cum laude, at dalawang summa cum laude.
Pinangunahan ni Ian Patrick Alcance, Bachelor of Science in Marine Transportation, ang commencement address sa Cluster 1 kung saan ibinahagi niya ang anim na taong pananatili sa pamantasan.
“Should I use this opportunity to make a name for ourselves? To vaunt our credentials? Or be proud that for the longest time in the history of this university, the valedictory address is coming from someone who is not wearing a gown and a tassel, but instead with a suit and a pershing cap? But that is not me. I was never raised to be that kind of man,” ani Alcance.
Samantala, binigyang-pansin naman ni Jhan Derille Unlayao, isang anak ng magsasaka at graduate ng Bachelor of Science in Information Techology, ang mga napapanahong isyu at kahalagahan ng sektor ng agrikultura sa kaniyang commencement address sa Cluster 2.
“When I was young, my father often said, ‘Anak, mag-aral ka nang mabuti para hindi ka magaya sa akin,’ his words and our life circumstances have opened my eyes to the harsh reality farmers face today. If we want to revive our agricultural sector, we need to change this misguided, stereotypical perception. Kaya huwang nating maliitin ang marangal na trabaho ng pagsasaka,” wika ni Unlayao.
Ginawaran din ang ilang mag-aaral para sa kanilang kontribusyon sa pananaliksik, at sa kanilang serbisyo sa komunidad.
Samantala, pinarangalan ang pitong most distinguished alumni ng Pamantasan na sina PCol. Madeline D. Cacao, Atty. Rachel Uy San Juan, Jasmine F. Virray, Dr. Melchor Avenilla Jr., Dr. Juanito A. Merle, Dr. Guillermo M. Rago, at Cherry Villamarzo-David.
