Sa loob ng isang taong paggawa ay nabuksan na ang bagong gusali ng Senior High School (SHS) at bagong kantina ng Basic Education Department (BED), Hulyo 31, na disenyo ni Ar. Raul Villanueva at isinagawa ng Rockwell Construction ni Engr. Eric Sy.
Pinangunahan nina Chairman/CEO Wilfrido Enverga, maybahay na si Gng. Grace Enverga at Pangulong Naila Leveriza ang seremonya na pagpuputol ng laso, katuwang si Gng. Reina Pasumbal, punong guro ng Basic Education Department.
Isinagawa naman ni Fr. Ramil Esplana, kapelyan ng Pamantasan, ang pagbabasbas ng mga silid aralan, laboratoryo, silid aklatan, silid ng mga guro, dance studio at kantina.
Sinimulan sa doksolohiya, pambansang awit at himno ng Pamantasan sa pangunguna ng MSEUF Concert Singers ang ikatlong yugto ng programa. Sinundan ito ng bating panimula ni Gng. Pasumbal at mensahe mula kay Pangulong Leveriza.
Nagpahayag ng kagalakan ang Pangulo na nagampanan ng Pamantasan ang hininging tulong ng Kagawaran ng Edukasyon na alalayan ang pagbubukas ng Senior High School Program sa Dibisyon ng Lucena.
Samantala, kinatawan ni Assistant Schools Superintendent Babylyn Pambid si Superintendent Dr. Aniano Ogayon na nagpahayag ng kagalakan sa pagtatayo ng SHS Bldg. na may mga angkop na pasilidad para sa mga mag-aaral.
Dumalo rin sina VP Dr. Benilda Villenas, Evelyn Abeja, Celso Jaballa at Cesar Wong kasama ang iba pang opisyal ng Pamantasan. Inanyayahan din ang mga stallholders ng bagong kantina.
