Hindi mapantayan ang saya nina Kyle Eiron E. Delos Santos at Allen Jerhsey De Leon mula sa College of Business and Accountancy (CBA) matapos hiranging kampeon ng Vocal Duet sa Intramural Games 2023, Okt. 28.
Isiniwalat nina Delos Santos at De Leon na ang pinaka-inspirasyon nila ay ang makakuha ng dalawang ginto para sa kanilang departamento.
Pinakilig ng dalawa ang madla sa University Covered Court gamit ang sariling bersyon ng Babalik Sa’yo ni Moira Dela Torre na humakot din hiyawan dahil sa kanilang pampakilig stunts.
Binalot agad ng hiyawan ang Covered Court matapos magpakita ang dalawa nang magkahawak kamay; sunod-sunod na sigawan din ang ibinigay ng madla sa tuwing sila’y magkakalapit.
Handog naman nina Hailey Kate Laqui at Joseph Israel Aureada ng College of Education ang medly ng Kay Ganda ng Ating Musika at Isang Mundo, Isang Awit na nagpanalo sa kanila sa 2nd place.
Isang inspirasyon din ang inihandog nina Geoffrey Daya at Angelica paderon ng College of Nursing and Allied Health Sciences nang awitin ang kantang Bawat Daan na nagpanalo naman sa kanila sa 3rd place.
Ang mga medalya na nakamit ng bawat manganganta ay dagdag na medalya para sa kanilang kolehiyo.
